My passion is to inspire you start your own self-healing journey and teach you happiness in a unique new ways .
De-stress with A Horse
Time spent with horses in never a waste of time :)
DE stress with A Horse
لو أنتى حاسة أنك مضغوطة و متوترة معظم الوقت , علطول حاسة بزهق و ملل مهما تعملى , عايزة تطبطبى على نفسك و تخففى شوية التوتر و الضغط اليومى , اليوم دة معمول مخصوص علشانك
اليوم دة عبارة عن يوم ترفيهى و خروجة مختلفة هنقضيه فى نادى الفروسية مع الخيول علشان نخرج من ضغط و توتر الحياة اليومية بتجربة جديدة
التجربة دى للبنات فقط و هدفها أنها
- تكون يوم ترفيهى يساعدنا نعبر عن الضغط و التوتر اللى إحنا حاسين بيه فى حياتنا اليومية بطرق مختلفة و نقلل من تأثيره علينا
- نفصل مخنا شوية من التفكير فى كل حاجة كبيرة و صغيرة تعبانا و نجرب نستمتع بحياتنا هنا و دلوقتى
- تجربة مختلفة تضيف ذكريات حلوة لحياتك
- نقابل ناس جديدة و هنتابع بعض بعد الإيفينت لأن كل واحدة فينا هتطلع من الإيفينت بأهداف معينة علشان تقلل الضغط فى حياتها أو تتغلب على مشكلة معينة فلو جاية لوحدك متعرفيش حد أوعى تخافى <3
- لو معاكى أطفال هاتيهم و تعالى هيعملوا أنشطة مع الخيول أو الponies و هيتبسطوا جدا بتجربة جديدة تساعدهم يكونوا متعاطفين أكتر و عندهم ثقة فى نفسهم و يقدروا يعبروا عن نفسهم بحرية
هنعمل إيه خلال اليوم ؟
- هيكون ميعادنا إن شاء الله الساعة 4 عصرا
- هنتعرف على بعض بصدق و عمق و هنشرح المبادىء اللى هتساعدنا نستفاد من اليوم أحسن استفادة ممكنة
- هنعمل اختبار بسيط يورينا لغاية فين إحنا حاسين بالضغط و التوتر فى حياتنا
- هيكون معانا مدربين محترفين هيدونا معلومات إذاى نتعامل مع الحصان بأمان و إذاى نركب صح و هيكونوا معانا طول اليوم , و مفيش أى مشكلة لو أول مرة تركبى حصان
- هنركب خيول و هنعمل أنشطة بسيطة على الأرض و جوة الإسطبلات مع الخيل
- بعد ما نخلص الأنشطة مع الخيول هيكون عندنا فقرة نقاش مفتوح عن مصادر الضغط و التوتر فى حياة كل واحد فينا و إذاى ممكن نحاول نتعامل مع الضغط و التوتر دول بشكل أحسن
- هنتكلم مع بعض عن الأفكار و المشاعر اللى حسينا بيها خلال اليوم و طلعنا بإيه من التجربة دى ؟
ليه و اشمعنا يوم ذى دة مع الخيول ممكن يقلل الضغط و التوتر ؟
حركة الجسم على على الحصان تعتبر كعلاج طبيعى لعضلات الجسم و بتساعد على الاسترخاء
ركوب الخيل و التعامل معاها فى أنشطة بسيطة بيفرز هرمون اسمه OXYTOCIN فى المخ اللى بيسموه هرمون الحب اللى إفرازه بيقلل إستجابات الخوف و التوتر اللى شغالة فى جسمنا ليل نهار و بيساعدنا نحس بالهدوء و التواصل والاستمتاع باللحظة أكتر
الخيول كائنات ضخمة و مع ذلك مسالمة جدا و وديعة و حساسة جدا لكل حاجة حواليها فى البيئة بما فيها البشر و مشاعرهم و التواصل مع كائن كبيرومسالم ذى الحصان بيدينا مساحة للإحساس بالأمان و الاسترخاء بدل الخوف و التوتر اللى بنحس بيهم فى علاقات كتير يومية
و علشان الخيول كائنات حساسة جدا بتحس بمشاعرنا و حالتنا النفسية اللى إحنا ممكن نكون مش واخدين بالنا منها اصلا و بتعكس لينا دة , دة بيساعدنا نحس أكتر بمشاعرنا اللى إحنا غرقانين فيها و نفكر نديرها إذاى
مع الخيول بنكون موجودين هنا و دلوقتى مش غرقانين فى إمبارح أو خايفين من بكرة و بنحس مع الخيل أن إحنا أسرع و أقوى و أكبر و دة بيساعدنا نشوف مشاكلنا بطريقة مختلفة و يدينا طاقة نرجع تانى نتعامل معاها و نحلها
إيه اللى يفرق اليوم دة عن أنك تروحى تركبى خيول فى الهرم أو فى أى مكان ؟؟ :D
اليوم دة مش مجرد ركوب خيل هو يوم ترفيهى بس مصمم علشان يساعدك تقللى الإحساس بالضغط و التوتر بكذا طريقة و هيكون فيه أنشطة مختلفة غير الركوب و كمان هنتناقش إذاى ممكن تتعاملى مع الضغط و التوتر بطريقة أحسن فى حياتك عامة و تكونى واعية بيهم و بمصادرهم
أنا مين ؟
أنا اسمى داليا أشرف , صيدلانية و جزء من اهتمامى بعلاج الناس هو مساعدتهم على الاهتمام بالجزء النفسى من حياتهم بكل جوانبه و تأثيره علينا علشان كدة أنا شغوفة جدا بعلم النفس و خاصة علم النفس الإيجابى و كمان شغوفة بالفروسية و ركوب الخيل بعد ما جربت كذا رياضةو كانت دى الرياضة الوحيدة اللى وقعت فى حبها لأنى حسيت من أول مرة اتعاملت فيها مع الحصان بإحساس أمان و ثقة و سعادة كنت ساعتها بدور عليه بشدة و مكنتش لاقياه بعد كدة فهمت إذاى الخيول بتساعدنا نكون أحسن نفسيا و دى كانت فرصة علشان أجرب طريقة جديدة تساعدنى أكون أحسن نفسيا و بالتالى أدائى فى كل مواقف حياتى يكون أحسن زى ما كلنا بندور على طرق نفهم و نحسن بيها نفسنا علشان كدة أنا بنظم اليوم الترفيهى دة و الهدف منه أن إحنا نلمس جمال ركوب الخيل و التعامل مع الخيول
:)
المكان هيكون :
نادى الفروسية بالجزيرة ( أقرب محطة مترو دار الأوبرا )
عنوان النادي : شارع سراي الجزيرة - الجزيرة الزمالك
الميعاد
يوم 23 أغسطس 23/8
من الساعة 4 عصرا إلى الساعة 9 مساءا
تكلفة اليوم فى الحجز المبكر 350 جنيه حتى يوم 10 أغسطس 10/8
بعد يوم 10 /8 تكلفة الحجز 450 جنيه
( فيه خصم للمجموعات بدءا من فردين )
( خصم للأعضاء الحاليين بالنادى 50 % )
اخر ميعاد للحجز يوم 17/8
العدد محدود 15 شخص علشان نضمن جودة اليوم
طرق الحجز عن طريق فودافون كاش بتحويل المبلغ على رقم 01002647140
لو حابة تسألى أى أسئلة ممكن تبعتيلى رسالة على رسايل الصفحة أو تبعتيلى واتس اب على نفس الرقم 01002647140 و هرد على أى استفسارات
Photos from the Horse fun day
رحلة شفاء نفسك بتبتدى بقرار
و فى الطريق بتلاقى السعادة
Your self-healing journey starts with a decision and on the way you find
Happiness :)
قصتى ليه و إمتى قررت أشفى نفسى و أدور على السعادة
من و أنا صغيرة من أول لما دخلت المدرسة كانت الرسالة اللى وصلتنى من كل اللى حواليا بشكل غير مباشر أنى لازم دايما أكون شاطرة و متفوقة و أحاول أكون أحسن واحدة , و أنا كطفلة صغيرة افترضت أن دة صح و أن دة هدفى فى الحياة أنى أكون شبه كاملة علشان كل الناس اللى حواليا يكون راضيين عنى و يحبونى
و ابتدت رحلتى الدراسية بالفكرة دى و أول مرة طلعت فيها الأولى كانت فى أول سنة ليا فى المدرسة و مكانش إنجاز أصلا بس أنا فاكرة لغاية دلوقتى لأن ساعتها كان إنجاز حقيقى بالنسبة لى و كانت اخر مرة تقريبا فى حياتى لغاية دلوقتى أحس بالإنجاز و النجاح و أحس بالرضا عن نفسى مع أنى طلعت من الأوائل كتير أوى بعد كدة :D
بعد كدة ابتديت أتدرج فى المراحل الدراسية و كنت شاطرة و متفوقة و كل مدرسينى بيقولوا عنى أنى مجتهدة بس أنا داخليا كنت دايما حاسة بالضعف و انى مش كويسة كفاية لأنى مكنتش بحقق التوقعات اللى مطلوبة منى بالظبط , و كنت من جوايا شايفة أنى لازم علشان ابقى راضية عن نفسى و أرجع أحس بالإنجاز لازم أحقق التوقعات اللى محطوطة لى بالظبط يعنى علطول أطلع الأولى و أكون مذاكرة كل حاجة و بتصرف صح فى كل المواقف , يعنى باختصار كنت شايفة أنى لازم أكون كاملة علشان أرجع تانى أحس بالأمان و الراحة و الرضا من جواياو كملت بالنفسية دى فترة كبيرة , دايما يوم النتيجة بالنسبة لى هو اليوم اللى هحس فيه بألم شديد لأنى محققتش التوقعات المطلوبة منى أو مكنتش أحسن واحدةلغاية لما وصلت للثانوية العامة اللى بيسموها عنق الزجاجة و كانت سنة عبارة عن توترشديد و تعب نفسى أشد لأنى خلاص تعبت من إحساس الخذلان اللى أنا علطول حاسة بيه و عايزة أحقق الإنجاز شبه الكامل اللى يرجعنى أحب نفسى تانى, و خلصت السنة دى على نجاح بتفوق بس برضه مش زى التوقعات اللى كانت مطلوبة منى أو اللى أنا كنت عايزة أحققها علشان أحرر نفسى و أرجع أحس بالرضا تانىو بعديها بفترة قصيرة دخلت فى أزمة نفسية شديدة و مريت بفترة عانيت فيها كتير من أعراض إكتئاب ( توتر و قلق شديد – تقديرى لذاتى و لقيمتى كان منخفض جدا – نوم فترة طويلة – خوف من مقابلة الناس و الكلام معاهم و هكذا )بس لما لاقيت أن الأزمة دى مطولة معايا قررت أنى لازم أخرج نفسى منها بأى شكل و اتجهت أنى أروح لناس متخصصين يساعدونى و ساعتها زرت أكتر من حد منهم أخصائى نفسى و قعدت أحكيله أد إيه أنا حاسة بألم نفسى رهيب شيلاه معايا و جوايا فى كل حتة و فى كل وقت و بعدت ما خلصت خالص لقيته مسك ورقة وقلم و رسم 3 دواير و قالى كلنا جوانا 3 أشخاص , الراشد و المراهق و الطفل , انتى عايشة بس بالراشد و عايزة تبقى كاملة و عاقلة فى كل حاجة و الطفل اللى جواكى نفسه يعبر عن نفسه و يشوف النور , الطفل اللى جواكى عمال يصرخ علشان كدة أنتى حاسة بألم رهيب , الطفل اللى جواكى محبوس , روحك محبوسة , محبوسة فى توقعات مطلوبة منك , فى أحكام محطوطة عليك, نفسك و قيمتك الحقيقة محبوسة و مقفول عليها بالضبة و المفتاح , ساعتها الفهم دة نور جوايا و قررت أنى عايزة أفهم نفسى و أفهم أفكارى و مشاعرىمن هنا طلع للنور شغفى بعلم النفس و علم النفس الإيجابى و بكل ما له علاقة بفهم دواخل الإنسان و دوافعه و أفكاره و مشاعره و قررت أنى أنا اللى هطلع نفسى من الأزمة دى واحدة واحدة بالوعى و الفهم و تطبيق المعلومات اللى بتعلمها لغاية لما أحرر روحى و أحرر نفسى من كل القيود النفسية اللى وجعانى و تعبانى
و الغريب أنى خلال رحلتى لفهم و شفاء نفسى ابتديت ألاحظ كمية الناس اللى حواليا اللى عايشين فى حالة تصنف كدرجة من درجات الاكتئاب و روحهم محبوسة و عايشين فى سجن داخلى و مش واعيين أزاى ممكن يخرجوا نفسهم من الحالة دى و بقيت لما بسأل نفسى أنا نفسى أعمل إيه لباقى حياتى ؟ كانت الإجابة بتيجى من جوة واضحة أنى عايزة أحرر نفسى و أحرر أكبر قدر من الناس من السجن الداخلى اللى بنكون عايشين فيه و إحنا مش واخدين بالنا و اللى بيكون ليه أسباب نفسية كتير , و فيه ناس بتعيش و تموت روحها و نفسها مخنوقة و مسجونة عاشوا و ماتوا من غير ما يدوقوا طعم الحرية النفسية و السلام النفسى الداخلى
و علشان أنا خلال رحلتى لتحرير نفسى كان جزء مهم جدا جوايا بيعشق الإختلاف و الإبداع و الخيال فكنت شايفة أن طرق العلاج النفسى المعروفة و الاستشارات النفسية التقليدية مهمة , لكن فيه طرق تانية مختلفة تقدر تدخل جوة الظلمة اللى جوة كل واحد فينا بشكل أسرع و تأثر فيه و تساعده يتحسن نفسيا بشكل فعال أكتر لأنها طرق بتخاطب الطفل اللى جوانا اللى إحنا مش واخدين بالنا منه وأحيانا و لا نعرف أنه موجود أصلا و بتأثر فى العقل بطريقة أحسن و أسرع و كمان بتخلينا نقدر ناخد خطوات عملية للتغيير أسرع و أحسن و دة اللى حصل معايا لما جربت الطرق دى بنفسى و منها جه شغفى لفكرة العلاج النفسى و تنمية المهارات مع الخيول و العلاج باستخدام طرق أخرى مبتكرة , دى أفكار و تجارب هتغير حياتك و هتوريك عالم جواك أول مر تحس بيه و تشوفه و هتفتتح الباب لروحك و لنفسك الحقيقية و للطفل اللى جواك يرجع حر تانى و يرجع يملا الدنيا جواك فرح و سرور
مع تمنياتى بالحب و السعادة و الونس لكل الباحثين عن السلام و الحرية النفسية فى هذه الدنياLet's Be Friends
Your Happiness Guide-Dalia ashraf
send my a message on
01014647215
